Maður ársins ert þú!

Er þetta ekki með því hallærislegasta, maður ársins ert þú. Tímaritið Time hefur valið mann ársins áratugum saman en nokkrum sinnum hafa þeir ákveðið að velja ekki einstakling heldur óræðan hóp; 1966 völdu þeir td. aldurshópinn 25 ára og yngri, 1975 voru það amerískar konur, 1982 völdu þeir tölvuna og 2003 var það ameríski hermaðurinn. En sem sagt í ár gátu ritsjórarnir ekki komið sér saman um neinn einn einstakling sem hefði haft áhrif á milljónir manna með aðgerðum sínum, heldur völdu þeir alla þá sem nota alnetið, hvort sem það eru þeir sem skoða eða þeir sem setja efni út á netið.

Time hefur valið mann ársins (man, woman or idea) síðan 1927 og er skilyrðið að viðkomandi hafi með aðgerðum sínum haft veruleg áhrif á líf fólks eða gang heimsmála, hvort sem það er til góðs eða ills. Til dæmis völdu þeir Adolf Hitler mann ársins árið 1938 og Jósef Stalín árin 1939 og 1942 og eru það dæmi um menn sem höfðu gífurleg áhrif, en ekki til góðs. En þrátt fyrir allt það sem er að gerast í heiminum í ár þá geta ritstjórar Time ekki fundið einn einasta mann sem hefur haft nógu mikil áhrif á líf fólks til þess að verðskulda það að vera maður ársins. Í staðinn velja þeir mig?

Athugasemdir

[akj (IP-tala skráð) 18.12.2006 kl. 14:14]

Ekki þetta uppgerðarlítillæti sem felst í spurningarmerkinu við lok ofangreindrar færslu. Kerrtu bara hnakkann og stormaðu út fullur stolti vegna þess trausts sem Time ber til þín, það ætla ég að gera!