Hótel Jörð 2007

Allir þekkja sígilt kvæði Tómasar um Hótel Jörð, enda líking jarðarinnar við hótel er einföld og skýr. 

Á öllum hótelum eru brunavarnarkerfi.   Eftir áralanga vinnu á vettvangi með okkar frábæra Slökkviliði Höfuðborgarsvæðisins þekki ég vel hvað gert er þegar eldboð berst frá slíkum kerfum í stórum byggingum -  ef ekki nema vaknar grunur um eld er strax brugðist harkalega við, hótelið rýmt og allt tiltækt björgunarlið kallað á vettvang.  Ef eldur finnst er hann slökktur strax.    Hótelið og íbúar þess nýtur vafans.

Ef heimfæra ætti ástand Hótel Jarðar á nútímann er ástandið orðið þannig í dag að mörg herbergi eru þegar brunnin til kaldra kola í mengun.  Nokkrar hæðir eru reykfylltar og á öllum hæðum koma brunaboð frá einhverjum reykskynjurum.  Mengun, fjöldaútrýming dýra og plöntutegunda, eyðilegging regnskóga, þurraustur á námum og gróðurhúsaáhrif, öll þessi vandamál hafa náð þvílíku umfangi að samkvæmt mælingum er mögulegt að okkar góða hótel verði rústir einar eftir nokkra áratugi - sekúndur í lífi jarðarinnar.  Keppnin um að koma sér að og krækja sér í nógu þægilegt sæti er að eyðileggja hótelið.

Samt eru þeir til sem berja höfðinu við stein.  Fólk eins og þessi, þessi og þessi halda því fram að fyrst til séu enn nemar sem ekki verða varir við reyk þá hljóti allt að vara í góðu lagi.  Ef mögulegt er að ekki berist eldboð frá einhverjum af reykskynjurunum sé bara fráleitt að raska ró hótelgesta.  Ekkert vesen, enda gæti einnig hugsanlega verið um tæknileg mistök í reykskynjara að ræða.  Iðnaðurinn á að njóta vafans.  Svona viljum við hafa það.  Þeir vilja sofa rólegir í brennandi hótelinu og vilja að við öll hin gerum það líka.

Því miður er ekki um aðra gististaði að ræða.

Á morgun gefst Hafnfirðingum einstakt tækifæri til að hafna mengandi stóriðju í sínu bæjarfélagi og hægja á þessari þróun.  Ég vona að þeir kjósi með hag jarðarinnar í huga.

Íslenskir bankar undirbúa fjármögnun fyrirhugaðs álvers Norðuráls í Helguvík

Athugasemdir

[Jóhannes Einarsson, 30.3.2007 kl. 10:36]

Ætli KB starfsmaðurinn sem alltaf mætir á extra long giant fjallatrukknum sínum með 44" undir taki ekki að sér þessa vinnu. Það myndi hæfa honum vel, nema ef vera skyldi að verkkaupin sætti sig ekki við hve langur tími fer hjá honum í að finna hentuga gangstétt í nágrenninu til að leggja ófreskjunni á, því ekkert bílastæði er nógu stórt fyrir blessaðan fótafúinn manninn.

[Iris (IP-tala skráð) 30.3.2007 kl. 10:42]

Hjartanlega sammála þér og góð líking. Ég er alveg komin með nóg af þessari þróun á Íslandi og samt halda flestir Íslendingar áfram að gorta yfir okkar hreina landi. Ég hitti mikið af útlendingum sem ekki hafa komið til Íslands og segi þeim bara sannleikann um landið; það var einu sinni eitt það hreinasta og tærasta land í heimi...en flestum íslendingum í dag er orðið drullusama um náttúruna og vilja bara peninga, peninga og peninga. Fólk verður steinhissa á að heyra að þessi gamli hugsunarháttur sé enn við líði; að eyðileggja bara alla þessa náttúru án þess að kynna sér neitt eða leita eftir öðrum leiðum.
Vill svo til að ég ÁTTI heima nálægt einu af þessum helvitis verksmiðjum og mér varð svo nóg um að sjá afleiðingarnar af þessu og geta ekkert gert (enda líka bara hlegið af náttúruverndarsinnum á íslandi og þeir kallaðir vitleysingar) að ég flutti af landi brott. Hvernig á maður að lifa af landinu ef landið er ónýtt! Þá fer ég frekar og finn það heldur í einhverju öðru landi sem virðir náttúruna sína.

[Guðjón I. Guðjónsson (IP-tala skráð) 30.3.2007 kl. 12:32]

Þetta var falleg líking hjá þér. Ekki ætla ég að bæta fyrir frjálshyggjuguttana sem mér dauðleiðist að heyra í. Það er hins vegar annar steinn sem hinir svokölluðu "náttúruverndarsinnar" berja sínum haus við og hann er að ef framleiðslan fer frá Íslandi, þá hverfi mengunin. Það er ekki svo. Hún getur þvert á móti aukist.
Ef hvert mannsbarn kaupir eina álpappírsrúllu á ári og hendir í ruslið þá þarf að framleiða 2.000.000 tonna af áli á ári bara í það. Hvar á jarðkúlunni á að framleiða þetta.
Skoðaðu eigin neyslu kallinn minn og dragðu úr bruðlinu, þá skal ég mótmæla álverum með þér (var sjálfur álversandstæðingur en skipti um skoðun). Þangað til ætla ég að styðja fleiri álver.

Kveðja
Gaui

[Andrea J. Ólafsdóttir, 9.4.2007 kl. 14:30]

Vil benda honum Gaua hér að ofan á það að náttúruverndarsinnar hafa einmitt verið að benda á það að samhliða náttúruvernd á Íslandi verði að fara náttúruvernd heims. Við höfum einmitt verið að benda á það þúsund og milljón sinnum að allir, já ég meina allir þurfa að huga að neyslumynstri sínu og það þarf umfram allt að draga úr álframleiðlsu á heimsvísu - draga úr frumframsleiðslu áls sem er algerlega ónauðsynlegt, eins og t.d. álpappír og godósum sem eru ofboðsleg sóun á náttúruauðlindum jarðar þegar litið er á stóra samhengið. Það þarf að stórefla endurvinnslu í BNA, einu mesta sóunar- og neyslulandi nútímans. Þar í landi var rúmlega 7 milljónum tonna gosdósa hent á síðast liðnum áratug og talan fer upp á hverju ári. Þetta jafngildir 316.000 Boeing 737 farþegaþotum á einum áratug sem er 25 sinnum flugfloti alls heimsins!!!

Þessa sóun hafa náttúruverndarsinnar verið duglegir að benda á. Það þarf að draga úr frumframeiðslu áls í heiminum og setja hagsmuni jarðar fram yfir og ofar en hagsmuni hluthafa álfyrirtækjanna sem græða að sjálfsögðu á þessari sóun. Sóunin er þeirra gróði.

Auk þess verð ég ávallt að benda fólki á það að þótt framleiðslan fari héðan og til annarra landa þá verður ekki meiri mengun. Það er ekki verið að loka koladrifnum álverum fyrir þau sem opna hér. Ég hef hringt og spurt Alcoa. Auk þess verða íslendingar að fara að skilja að vatnsafl finnst mjög víða í veröldinni og meirihluti álvera (60-70%) er knúinn með hinum svokölluðu hreinni orkugjöfum eins og vatni og jarðvarma. Þegar framleiðslan er flutt á milli landa eins og gert er í dag, þá verður bara að taka með í reikninginn mengunin sem kemur af flutningunum. Annað er ekki réttlætanlegt. EINA ástæðan fyrir því að álfyrirtækin vilja koma hingað er sú að á heildina litið er ódýrara að framleiða það hér vegna orkuverðs. EINA ÁSTÆÐAN. Svo einfalt er það. Þeirra eina og æðsta hugsun er að græða peninga og meiri peninga, alveg sama hver mengunin er eða sóunin á auðlindum jarðar.  Ef þau hins vegar geta grætt meira vegna almenningsálits á því að framleiða með vatnsafli og þykjast styðja náttúruvernd með því að setja smápeninga í það í þeim löndum sem þeir koma og eyðileggja stóran hluta náttúrunnar - þá gera þau það. Þetta snýst bara um að græða peninga. Því meiri sóun, því meiri peningar!