Elvis Presley á latínu

Getur einhver ímyndað sér hvernig Elvis Presley hljómar á latínu? Á ferð í Finnlandi fyrir nokkuð mörgum árum rakst ég á plötu með finnska tónlistarmanninum Doctor Ammondt þar sem hann flytur nokkur af þekktustu lögum Elvis Presleys á latínu. Platan kom út árið 1994 og heitir "The legend lives forever in Latin". Þar eru lög eins og Nun aeternitatis (I surrender), Nunc hic aut numquam (It's now or never) og Tenere me ama (Love me tender). Í allt eru sjö lög á plötunni og virðist yfirfærslan á latínu hafa tekist vel. Hins vegar eru útsetningarnar ekki upp á marga fiska, hljómar helst eins og Doctor Ammondt sé með einfaldan skemmtara við undirleikinn. En það er samt húmor í disknum og ekki oft sem tónlistarmenn flytja texta sína á löngu dauðu tungumáli; latínu.

En mér varð hugsað til Doctor Ammondt og Elvis Presley plötu hans þegar ég sá að í kvöld ætlar hljómsveit sem kallar sig upp á finnsku Mina Rakastan Sinua Elvis að troða upp á Domo í Þingholtsstrætinu. Talsmaður hljómsveitarinnar, Kormákur, sagði í viðtali í Mogganum í gær að þótt margir hafi vissulega spreytt sig á Elvis hafi trúlega enginn nálgast hann með þeim hætti sem þau muni gera á sínum tónleikum. Það verður spennandi að sjá hvort þau nái að toppa finnska kollega sinn Doctor Ammondt með latínu texta sína.

Athugasemdir

[Breki Karlsson, 8.2.2007 kl. 11:08]

Elvis lifir!

Finnar virðast annars vera hrifnir af hinu ágæta tungumáli latínu. Sem dæmi sendir finnska ríkisútvarpið vikulega út fréttir á latínu.

[Árni Matthíasson , 8.2.2007 kl. 14:33]

Ekki er bara að Finnar séu hrifnir af latínu, þeir eru líka hrifnir af Elvis. Fyrir nokkrum árum keypti ég í Finnlandi plötuna Sleepy Sleepers Sings Elvis þar sem sú frábæra hljómsveit Sleepy Sleepers flytur Elvislög með sínu nefi (kom út 1989). Inn á milli laga eru svo viðtöl við Elvis. Á finnsku, nema hvað.

Höfuðpaurar Sleepy Sleepers, Sakke Järvenpää og Mato Valtonen, stofnuðu síðar  Leningrad Cowboys, sem allir þekkja, en það er önnur saga.

Geri að tillögu minni að þessar plötur fái að hljóma í árshátíð Krumma síðar í mánuðinum.

[Anna Ólafsdóttir Björnsson, 8.2.2007 kl. 16:29]

Þýðingar dægurlagatexta á latínu eru heldur ekkert sér-finnskt fyrirbæri, þótt þeir séu nú líklega í fremstu röð (fréttir á latínu í mörg ár, eins og fleiri eru búnir að upplýsa). Ef einhver man svo langt aftur að þekkja lagið ,,Á heimleið" (Lýsa geislar um grundir) sem var popplag sungið af nefmæltum söngvara sem mig minnir að hafi verið á Akureyri, þá er það lag líka til með latneskum texta og var rosalega vinsælt í MR í kringum 1970. Þetta lag hefur líka verið tilnefnt á einhverjum spjallþráðum sem versta lag allra tíma - mjög verðskuldað. - Smá uppfletting segir að þetta hafi verið Póló og Bjarki og lagið er til (því miður bara á íslensku) á tonlist.is

[Kolgrima, 8.2.2007 kl. 23:15]

Latínan lifir!

Svo eru þeir sem lesa Ástrík bara á latínu.

[KL (IP-tala skráð) 11.2.2007 kl. 04:26]

...eða Harrius Potter