Buzz hefur innreið sína

Það er skemmtilegt að fylgjast með því, hvernig fólk mjakar sér varlega út á Buzz, nýjan samskiptavef Google, sem er aðgengilegur af Gmail.

Auðvitað er þetta nýtt form af bókmenntum, knappar setningar eins og á Fésbókinni.  

Og það má heyra veikar raddir óma héðan og þaðan.

Ólafur Nielsen: Halló, er einhver þarna?

Kristian Guttesen: Hvar er húfan mín? 

Garðar Forberg: Jæja.

Karl Pétur Jónsson: Er þetta eitthvað?

Svanborg Sigmarsdóttir: Ætli það sé einhver sem buzzar?

Facebook er oftast nefnd Fésbókin, að minnsta kosti í mín eyru, en ég hef líka heyrt orðið snjáldurskjóðan. Nú er bara spurning, hvað á að kalla samskiptavefinn Buzz?

Búsið, beisið, brasið, bössið?

Eitthvað allt annað?

Athugasemdir

[Jón Steinar Ragnarsson, 12.2.2010 kl. 05:28]

Heyrði líka nafnið Fjasbókin, sem mér finnst höggva ansi nærri eðli fyrirbrygðisins.  Buzz gæti þá kannski orðið mas eða mazið. Annars bössuðu menn hvern annan hérna á meðan símboðarnir voru og hétu, svo það væri ekki ur vegi að dusta rykið af því orði.  Annars nota ég ekkert af þessu.  Það er svipað andríki þarna og á Irkinu í den. Ég held mig við skæpið. Þar get ég sent textaboð, leyft öðrum að skoða skjáinn minn, sem er gott í þeirri hönnunarvinnu, sem ég er í.  Sömu fídusar fylgja raunar gmail umhverfinu.  Sama og MSN og það allt.  Ég er of gamall fyrir svoleiðis tjatt.